الموضوع فعلاً مؤثر إلى حد الغثيان ... حاجة كدة محتاجة ليمونة عشان تتبلع لعل الأخ القط لا يعرف أن نصف الشعب المصري نسي ريحة طشة الملوخية ... لأن الملوخية عايزة شوربة والشوربة عايزة فرخة والفرخة عند الفرارجي والفرارجي عايز فلوس ومافيش فلوس وإن كانت الملوخية بتتميز إن الطشة بتاعتها بتتشم عن بعد، يعني ممكن طشة لكل عمارة... نعمله إيه بقى إذا كان ساكن في منطقة بيئة محدش فيها بيعمل ملوخية عشان يشم طشتها؟ يعني بدل ما كان بيعايرنا زمان بس بأنه بيشحت علينا من إللي يسوي وإللي ما يسواش ... بقى بيعايرنا إن إحنا السبب في إنه ما بيشمش ملوخية ... لأ بس كله إلا إنه بيؤرقه قولة مريض لا يجد علاجاً آه يبدو إن هو ده السبب إن الدولة بتسعى حثيثاً في مستشفياتها للتخلص من كل المرضى بمنتهى الكفاءة ... عشان الريس بيزعل لما حد يقول آه يا كلاب ... واحنا إللي كنا بندور على السبب: "ليه بيعملوا في العيانين في المستشفيات كدة؟"